Advokattilsynet sender ut informasjon om innsending av eigenerklæring og årsrekneskap

Den årlege rapporteringa er ein viktig del av Advokattilsynet sitt arbeid for å føre eit effektivt og målretta tilsyn med advokatverksemd i Noreg. Opplysningane som blir gitt er avgjerande for at tilsynet skal kunne utføre oppgåvene sine på ein forsvarleg og risikobasert måte.

Viktig for eit risikobasert tilsyn

Advokattilsynet skal i tilsynsverksemda ha ei risikobasert tilnærming. For å kunne prioritere rett og bruke ressursane der behovet er størst, må tilsynet ha oversikt over kva risiko den enkelte rapporteringspliktige verksemd har for å bli misbrukt til kvitvasking eller terrorfinansiering.

Dette er bakgrunnen for at advokatføretaka blir bedne om å rapportere på relevante risikoforhold. Opplysningane inngår i Advokattilsynet si risikoklassifisering av norske advokatføretak, og dannar eit viktig kunnskapsgrunnlag for planlegging og gjennomføring av tilsyn.

Rapporteringa gir også Advokattilsynet nødvendig innsikt i organisering og drift i den enkelte verksemda. Dette bidreg til å styrke rettstryggleiken, tilliten til advokatstanden og kvaliteten på tilsynsarbeidet.

Nye spørsmål og utvida rapportering

For rekneskapsåret 2025 er det gjort enkelte endringar i rapporteringsskjemaet. Mellom anna skal advokatføretaka no opplyse om kva klientbankkontoar som har vore aktive i rapporteringsperioden, og liste opp desse i skjemaet.

Som følgje av plikter i advokatlova er rapporteringa knytt til organisering og drift òg utvida. I tillegg blir føretaka bedne om å laste opp relevant dokumentasjon, mellom anna eventuelle nummererte brev frå revisor.

Eit felles ansvar

Den årlege rapporteringa er ein viktig del av tilsynet for å sikre forsvarleg advokatverksemd og hindre skade og tap hos klientar, samt å førebygge økonomisk kriminalitet.

Ved å gi korrekte og fullstendige opplysningar bidreg advokatføretaka til at tilsynet kan rette merksemda mot område der risikoen er størst – til beste for både advokatstanden, klientane og samfunnet.

Informasjon om bidragsplikta og innsending av eigenerklæring og årsrekneskap blir sendt personleg i Altinn. Verksemder som ikkje har levert eigenerklæringsskjemaet, vil få dette sendt til verksemda si innboks i Altinn.

Frist for betaling og innsending er 30. april.